ОЗ ТУСЬЯС

"Лышкыд киа, тыра нопъя Моз"[1]

Вайис сьöрсьыс кыа рöма оз.

Öти мыччис меным, öти – тэныд.

Ичöт кодзувыдлöн биыс пемыд –

Кык кодзувлöн биыс ёрö син!

Гöрдов вотöс – сьöлöмыдлöн джын,

Чöскыд тусьсьыс лов пыдiын шоныд…

Сöмын, кöнкö, ёртъясöн оз лоны.

---

[1] Т.Шаховалöн «Гожся серпас» кывбурысь.

Письмö

***

Чолöм! Талунъя сынöдыс сэтшöм сöдз…

Шулiн: олöмыд – тöв вылын лежнöг чаль.

Посни кодзувъяс öкты да мулань кöдз,

Кыдзи кöсйысьлiн коркö. А сэсся таль.

Кыдзи олан? Мый вöтасян? Но, эн шу.

Сiдз жö пöрысьмö чужöмыд лунысь лун?

Дас квайт арöн и лым чир  ки вылын – шуд,

Кытчöдз дзикöдз он ылыстчы да он мун…

Мышкад видзöдi: бергöдчан, гашкö, бöр;

Медбöр воськовкöд керкаын кусi би.

Ичöт йöраным сулалiс лежнöг кöр.

***

Чолöм! Тöдан, а менам нин чужис пи…

Велӧдӧй менӧ гижны...

Велӧдӧй менӧ гижны, сьӧлӧмлы корсьны личӧд,

Велӧдӧй менӧ, кевма, муслунӧс нэмӧс видзны.

Велӧдӧй менӧ шытӧг, велӧдӧй пемыд войын;
Велӧдӧй менӧ кывны, кыдз шондi югӧр койӧ.
Велӧдӧй менӧ сьывны колипӧн пелысь йылын,
Велӧдӧй менӧ кывтны Изьвалӧн дзирыд гыӧн.
Велӧдӧй менӧ гижны, кывъясысь тэчны лача;
Велӧдӧй менӧ, кевма! Сӧстӧмӧн лоны надзӧн...



Фото - Вл. Ануфриев.

Вичча гожöм пом

Ме мöдтор йылысь мöвпавны ог вермы

И нинöм ог гиж… Сöмын тэ эн скöрмы:

Ме таво вичча, вичча гожöм пом.

Сэк вежсяс ставыс! Сэки лэбзя, ловзя,

Ме сэки лолöс восьтыны ог повзьы!

И сьöлöм лоас ыпъялысь да том.

Ме виччынысö сэтшöма нин мыдзи[1],

Кор босьта киö тупыль... Ичöт – ичöт.

Вай лок нин, козьнав шудсö, гожöм пом!

---

[1] Мыдзи (диал.) – мудзи 

Фото - Вл. Ануфриев.

Гижысь - лэбач

         

Гижысь ыджыд мир шöрас öтка-öтка,

Личкö сійöс му бердӧ сьӧкыд клетка.

Пöсь синваысь сімöма крепыд кöртыс,

Кыдзи сьылысь лэбачлы пудсӧ чöвтны?

Восьтны эськö ӧдзӧссö: «Пет жӧ, кылан!»,

Сöмын оз ло шудаöн вӧля вылын.

Кутасны поэтъясыд йöзлань лэччыны,

Кытчöдз эмöсь му вылын клетка тэчысьяс.

фото - Вл. Ануфриев.

Бара вой

Сирпемыд вой, и бара мен оз узьсьы,

Ун  оз нин лок, кöть мыйта сійöс кора.

Ме мöвпала сы йылысь, мый эз судзсьы,

А сьöлöм шӧрын турöб бöрдö нора…

Ме мукöддырйи вöтӧн аддза тэнö

И, кыдзи коркö, воськов вӧча паныд.

Кöть вӧтъясын ме кöсъя лоны сэні,

Кысь зэв нин уна визувтöма ваыс.

А тöдан, ме öд нинöм на эг вунöд,

Но казьтылöмысь овлö сэтшӧм сьöкыд.

Сы здукö весиг чӧскыдторйыс курыд,

Кыдз эз нин öтчыд вöвлы, войт оз пӧткöд.

Зэв тшöкыда сэк юасьлывла ассьым:

«А позис кö мен олöм кыдзкö вежны?»

Кöть туйыс водзын мытшöдтӧм и паськыд,

Мед другысь косны бӧрӧ либӧ кежны…

фотоыс В.Ануфриевлöн.

А тэ чайтiн, ме сэтшöм жеб...
Вывтi радейта бöрдны гусьöн.
Быдтi муслунöс тусьöн-тусьöн -
А тэ пыдöджык сiйöс дзеб.

Джуджыд толаын - синва войт,
Корсьны верма-ö, кытчö усис?
Коркö ме йылысь гусьöн-гусьöн
Ичöт пиыдлы рытын мойд.


Фотоыс Владимир Ануфриевлöн.