суббота, 1 ноября 2014 г.

«Дiюр». 2009.


Лöзалысь енэж улын
Зарниöн юргö вöр,
Нюр вывсянь öвтысь руöн
Вевттьысьö миян йöр.

Шаньмöма кисьмöм пелысь,
Дзирдалö эзысь шор;
Джынвыйö чегöм тöлысь
Вой шöрын ветлö нор.

Кыалöн усьöм вуджöр
Изьваын куйлö чöв,
Мыйлакö гажтöм, мудзöм
Тыдовтчö мöдлапöв.

Ворсöдчö рöмнас дзоридз,
Козьналö ассьыс мич,
Ягсянь дзик керка дорöдз
Шылькнитчö паськыд видз.

Тшöкыда ылад чайтсьö –
Виччö, оз аддзы ин.
Югöрöн воӧ татчӧ
Вунлытöм чужанін.



                                                                   Фото – Владимир Ануфриев


«Куим лун да нэм.» Юкöнъяс. 2010 во.

     Öтчыд тэ шуин, мый йöз да миян костын йитöдыс – кодöнкö шуштöм тöвся войö уна тор вылö орйöдлöм сунис. Тайö суниссö кöрталiгöн öтияскöд ми öтлаасям, а мöдъяскöд некор йитны позьтöм сунис помъясын колям. Ми видзöдам öта-мöд вылö, но ог кылöй  ёрта-ёртнымöс, и та вöсна ог гöгöрвоöй. Ми горзам, но чизыр тöв миянысь гораджык. Ми кöсъям воськовтны водзö, но полам усьöмысь. Ми корам шондi югöръяс, но найöс аддзигöн куням синъяснымöс да сiдзи и кольччам помтöг öшавны асланым сунис помын…
   Тöдан, талунъя пöся ыпъялысь вöртасын эм кутшöмкö тöдчанлун… Кутшöмкö сiйö лажмыд и йир кодь джуджыд, виччысьтöм и лöсьыд, енкöлаыскöд йитана и сэтшöм дженьыд… Сылöн ставсö шымыртысь биыс быттьö öзтö синмöн судзтöм лым толаяссö, öта-мöд бöрся сулалысь  ловтöм керкаяссö. Татшöм вöртассö ме аддзывлi нин некымын во сайын, но мый йылысь сэки мöвпалi, мыйöн олi – вочавидзны сьöкыд. Мый кöсйис сины меным öшинь пыр джоджö водöм гöрд югöр?  Вайис сiйö кутшöмкö юöр либö прöстö висьталiс йöзлы шондi пырöм йылысь? Гашкö, тэ и вермин эськö гöгöрвоны сылысь вежöртассö, вöлiн кö танi… А ме, кöнкö, и вунöдi нин, а вермас лоны, некор эг и велавлы гöгöрвоны.
  Мыйла тöвся кымöрыс сэтшöм пыдöстöм да чусыд? Прöшви кодь орйöдлöм енэжыс косявлö лолöс…




Фотоыс Владимир Ануфриевлöн.




"Изьва дiнса муслун" цикл. "Бобув" висьт. Юкöн.


...Ида ньöжйöника тувччалö дзоляник кельыд изъяс вывтi дзирдалысь ю дiнö. Изйыс  помтöм, со тай мый вöсна юысИзь-ва, изъя ва. Кымын матöджык юыс дiнö, сымын кöдзыдджыкöсь изъясыс: найö сотöны мортлысь коксö, йизьöмаöсь, öдва ловъяöсь. Оз кö сюр изйыслы мортлöн шоныдыс  сiйö чöла кувсьö да гуалö асьсö ваувса лыа пиö. А ваыс, ылiсяньыс сэтшöм лöз, матысяньыс, вöлöмкö, чусыд да пемыд. Ваыс мунö мортыс пыр, кöдзыдыс йиджö сьöлöмас. Ида век на кöсйö тöдны, мый йылысь мöвпалö сыкöд орччöн мунысь мортыс. Но ми öд нинöм сылы ог висьталöй? Шудлöн быд здукыс  – мортлöн дзонь олöм, а сутш мында олысь бобувлöн  нэм.

2012 во.

Фото - Владимир Ануфриев.