суббота, 14 мая 2016 г.

КОМИ КЫВ


Менам войвывса мойд, коми кыв, 
Кутшӧм дыр тэлань восьлалi чӧла… 
Ме и нэм помӧдз тэ дінӧ кела, 
Карысь петавлӧм ичӧтик ныв. 

Лолам йиджтысьӧм войт, чужан кыв,
Вӧлін сибавны позьтӧм да руа…
Ӧні содз тырӧн ме тэнӧ нуа.
Кӧсъян – вӧртасӧдз? Сӧмын тэ сьыв.

Кодкӧ ю шӧрӧ кольӧма тыв.
Сы пыр миянлы сӧдзтысьны колӧ.
Шонді ва вылӧ югӧрсӧ кольӧ,
Кыдзи лов вылӧ тэ, менам кыв.



понедельник, 29 февраля 2016 г.

Тыдавтӧм

Мӧвпъяс.
***
Тувсов шонді югӧр
ӧдӧба ковмуніс-писькӧдчис
тронякылысь чарӧм пыр,
син ёрмӧн югъялысь стеклӧ пыр,
лыбӧдчис – качис пызанті да
ляскысис сӧстӧм на кабала вылӧ…
Ола, медым гижны?
Гижа, медым овны?

***
Вермӧ-ӧ дзормыны енэж?
Но ӧд уна во сайын, тулысъявыв,
сійӧ вӧлі джуджыдджык да ясыдджык.
Вемӧсӧн-ӧ?
Збыльысь ӧд вӧлі?















***
Водi гожся шондi улын
пӧсялӧм турун вылӧ…
Ки кузя – дзоляник,
овны велавтӧм на енгаг.
Буракӧ, чайтӧма менӧ усьӧм пуӧн.















***
  Ю веркӧсыс талун – рӧмпӧштан.
Тувчча кӧ, жугласяс олӧм:
зёлькнитас-пазьмунас
зарни пыжъясӧн,
жбыркнитас-лэбзяс
    эзысь войтъясӧн,
    ту ни сюв воштысяс
    пу йывъяс костӧд.
    Но веськалас-ӧ
   Изьва юнымлӧн лолыс
   кӧть ӧти войтйӧн
   пиуклӧн сьӧлӧмӧ?











***
Видзчысяна пукся важиник качай вылам,
гашкӧ, бара кывла ачымӧс дзирыд югӧрӧн?
Но качай оз лэбзьы –
сійӧс кутӧ тыдавтӧм кабыр.
Тайӧ тэ.
Быттьӧ важӧн, сулалан дінам
да кутан усьӧмысь.
Но ме ӧд уси нин…
Чегӧм дзоридзьяс вылӧ
лӧня войталӧ зэр.


















***
Олӧм чӧжнас Сійӧ
эз вӧч мелань ни ӧти воськов,
эз долыдмӧд ни ӧти кывйӧн.
Но ӧтнас ловтырнас кывліс
и эбӧстӧмлунӧс, и гыалысь ловбиӧс.
Менам Пипу.























 ***
Ни шыӧн, ни видзӧдласӧн
ог вӧтӧдӧй нин кусӧм лун югыдсӧ.
Медвынаыс – мӧвп.
Шулісны-ӧ сылы, мый тайӧ – кадыс?

 ***
Медводдза лым вылӧ пасьмунӧм пелысь роз.
Ыпъялысь енэж. Муртса тыдалысь
кок туйын яндысьӧмӧн йӧктысь югӧр.
Аддза-ӧ ме коркӧ сэтшӧм краскаяс,
Медым серпасавны тайӧс?


















 
***
А тэ лоӧма дзик нин тыдавтӧмӧн…
Но ме ог лэдз тэнӧ ньӧтчыд!
Тэ – менам медбӧръя кывбур.


Фотоыс авторлӧн, Владимир Ануфриевлӧн да ӧтуввезйысь.







среда, 20 января 2016 г.

ОЗ ТУСЬЯС

"Лышкыд киа, тыра нопъя Моз"[1]
Вайис сьöрсьыс кыа рöма оз.
Öти мыччис меным, öти – тэныд.
Ичöт кодзувыдлöн биыс пемыд –
Кык кодзувлöн биыс ёрö син!
Гöрдов вотöс – сьöлöмыдлöн джын,
Чöскыд тусьсьыс лов пыдiын шоныд…

Сöмын, кöнкö, ёртъясöн оз лоны.





[1] Т.Шаховалöн «Гожся серпас» кывбурысь.

воскресенье, 13 декабря 2015 г.

Письмö

***
Чолöм! Талунъя сынöдыс сэтшöм сöдз…
Шулiн: олöмыд – тöв вылын лежнöг чаль.
Посни кодзувъяс öкты да мулань кöдз,
Кыдзи кöсйысьлiн коркö. А сэсся таль.

Кыдзи олан? Мый вöтасян? Но, эн шу.
Сiдз жö пöрысьмö чужöмыд лунысь лун?
Дас квайт арöн и лым чир  ки вылын – шуд,
Кытчöдз дзикöдз он ылыстчы да он мун…

Мышкад видзöдi: бергöдчан, гашкö, бöр;
Медбöр воськовкöд керкаын кусi би.
Ичöт йöраным сулалiс лежнöг кöр.

***
Чолöм! Тöдан, а менам нин чужис пи…








пятница, 11 декабря 2015 г.

Велӧдӧй менӧ гижны...


Велӧдӧй менӧ гижны, сьӧлӧмлы корсьны личӧд,
Велӧдӧй менӧ, кевма, муслунӧс нэмӧс видзны.
Велӧдӧй менӧ шытӧг, велӧдӧй пемыд войын;
Велӧдӧй менӧ кывны, кыдз шондi югӧр койӧ.
Велӧдӧй менӧ сьывны колипӧн пелысь йылын,
Велӧдӧй менӧ кывтны Изьвалӧн дзирыд гыӧн.
Велӧдӧй менӧ гижны, кывъясысь тэчны лача;
Велӧдӧй менӧ, кевма! Сӧстӧмӧн лоны надзӧн...



Фото - Вл. Ануфриев.




воскресенье, 19 июля 2015 г.

Вичча гожöм пом

Ме мöдтор йылысь мöвпавны ог вермы
И нинöм ог гиж… Сöмын тэ эн скöрмы:
Ме таво вичча, вичча гожöм пом.

Сэк вежсяс ставыс! Сэки лэбзя, ловзя,
Ме сэки лолöс восьтыны ог повзьы!
И сьöлöм лоас ыпъялысь да том.

Ме виччынысö сэтшöма нин мыдзи[1],
Кор босьта киö тупыль... Ичöт – ичöт.
Вай лок нин, козьнав шудсö, гожöм пом!








[1] Мыдзи (диал.) – мудзи 

Фото - Вл. Ануфриев.

пятница, 10 июля 2015 г.

Гижысь - лэбач

         
Гижысь ыджыд мир шöрас öтка-öтка,
Личкö сійöс му бердӧ сьӧкыд клетка.

Пöсь синваысь сімöма крепыд кöртыс,
Кыдзи сьылысь лэбачлы пудсӧ чöвтны?

Восьтны эськö ӧдзӧссö: «Пет жӧ, кылан!»,
Сöмын оз ло шудаöн вӧля вылын.

Кутасны поэтъясыд йöзлань лэччыны,
Кытчöдз эмöсь му вылын клетка тэчысьяс.


фото - Вл. Ануфриев.