Выль кывбур

Локтан да усь!
А ме видзöдны понда вылiсянь.
Лача эн кут,
Прöща кевмыны öнi нинöм жö.
Мыжаöн вöч!
Мед став грездыс ме вылын сералас –
Кöкъямыс во
Абу гöтыр, ни абу ёрт тэныд.
Коми поэт!–
Кутшöм тешкодь мен тайöс кывнысö.
Дой – ог сет,
Век на пыдзрала сыысь кывбуръяс.

Фото - Владимир Ануфриев 

Сувтыштлöй!

1.

Медводдза лымйыс мыжтöм да сэтшöм сöстöм…

И би вылас югъялö кодзувъясысь ярджыка!

 А ме кок туйöс сы вылын коли.

2.

Завидьта шондiлы. Лунысь лун

Кыпöдчö сiйö мичлуныслöн

Вылыс  тшупöдöдз.

3.

Колиплöн мелi сьылöмыс сувтöдiс менö

Дзоляник  чегöм  пелысь дорö

Здук кежлö.

4.

Ланьтöма ки пыдöс вылам гаг.

Мый  вöча сыкöд,

Виччысьö рама.

5.

Гöгрöс  гоб - тупылёк радпырысь

Шонöдчис дзирыд югöръяс улын.

Вешйи.

6.

Сöдз да ясыд войт

Нюкыльтiс ас улас

Ичöтик кыдз пу кор.

7.

Гижалi лыа вылö думъясöс, кöсйöмъясöс.

Виччысьтöг воöм  тöвру 

Енэжлань нуалiс найöс.

Фото-Владимир Ануфриев

Кольчча

Пӧрт  менӧ тӧвруӧ.

И ме кольчча,

Медым шӧпкӧдчыны

Коръясыдкöд.

Пӧрт  менӧ  колипӧ.

И ме кольчча,

Медым сьывны

Дзоридзьясыдлы.

Пӧрт менӧ бобувӧ.

И ме кольчча,

Медым гажӧдны син

Челядьыдлы.

Пӧрт менӧ ӧшкамӧшкаӧ.

И ме воша.

Медым нэм кежлӧ кольны

Енэжтасад.

Фото-Владимир Ануфриев

Мӧдлапӧлын

Мӧдлапӧлын олӧмыс унмовсьӧма.

Но кывлӧ на лолыштӧмыс

Ю дорса изъяс кост.

Инмӧдчыла чöвтöм му дорас,

Кывзысьышта.

Сибӧдла кӧдзыд изсӧ сьӧлӧм дінам,

Шонӧда да бӧр лэдза.

Бара эг гӧгӧрво  шыӧдчӧмсӧ –

Вунӧм кыв вылын чуксасьӧ

Мӧдлапӧлыс.

Фото - Владимир Ануфриев

---

Корся кыв

Сувта шондiöдз.

Корся кыв –

Асъя югыдас

Вошас дзикöдз!

Чöлы! Петкöдчы здук –

Да сыв.

Синмöс куньöмöн

Лыддя кыкöдз.

Öти!  

Сьöлöмöс, горшöс жам –

Ме и мездысьтöг

Тэнö кута!

Кык!

Тэ лэб,

А ме кольчча тан –

Шуда!

2014.

Фото-Владимир Ануфриев

---

"Миян ичöтик герой" висьт. Юкöн. 2010 во.

...Лунысь лун миян геройлöн чужисны выль и выль юалöмъяс, выль кöсйöмъяс, гуся мöвпъяс. Сöмын öнi ичöтик геройлы воссис, мый гöгöртасыс сылöн олö кутшöмкö кагаысь торъялана олöмöн… Герой кыдзкö здукöн омöльтчис, сöдз ойöстöм нюмыс сылöн воши, синъясын дзебсисны  неважöн на кусöдны позьтöм би киньяс… И вöр ­ ва лои кутшöмкö мöд… лёкпыр вашвидзысь, эбöстöм да, кöть и медъёна эз кöсйы петкöдлыны тайöс мукöдлы, дзор…

  Но тайö, кыдзи чайтсис миян геройлы, дзормöм вöрас кага помтöг мыйкö виччис. Со дзирдалö вижöдны заводитысь турун вылын кöдзыд, йи рöма лысва, со вына вой тöв вевттьö гудыр кымöръясöн сьöлöмтöм нин енэж… Збыль-ö ар, код йылысь миян кагалы некод на эз шулы, сайöдас, дзебас Олöмлысь став мичсö, став ловъя ловсö?...

­ – Мый  лоö мекöд?­ – шуштöма, но верстьö морт моз нин мöвпалiс миян кага.  И друг… кылiс сьылöм. Сьылiс миян ичöтик геройлы тöдса нин, быттьö лöзов сынöдысь мыччысьöм гöлöс. Чайтсис, быттьöкö тайö сьыланкывас эм миян ичöтик геройлöн юалöмъяс вылö став вочакылыс. Быд лолыштöмöн, быд шы гöгöрвоöмöн кага восьтiс ас водзас выль, сöмын сылы сиöм Олöм. Олöмыс тайö эз юксьы шудöн да дойöн, сылöн эз вöв ни заводитчöм, ни пом. Сiйö вöлi…

     Гöлöс козьналiс миян ичöтик геройлы ассьыс мывкыдлунсö, козьналiс сiйöс, мый ми тiянкöд, кöнкö, абу на дасьöсь гöгöрвоны…

   Сöмын öти  асылö, кор гöрдов арся шондi муртса на заводитiс мыччысьны кынмöм, лёткысьöм вожъяс костöд да мичанин кыдз пу  кос увъяс пыртi видзöдлiс тöдса пипу вож вылö, кöнi рытнас на дöввидзис вижöдöм, кага сяма сöстöм нюма ичöтик кор да эз аддзы сiйöс, кор кусыньтчöм пипу ньöжйöника шöпкöдiс кутшöмкö, буракö, регыд нин помасьысь, но коркö мича, мыла сьыланкыв, а тыртöм сьöлöма йöлöга вундалiс  йизьöм  сынöдсö   важöн нин вöрын юрöбтысь кывъясöн, öтка кыдз вашнитiс: «Нэм… Мый тайö -­ нэм?...» – да бергöдчис  неылын сайöдчыштöм  да кыдзкö шмоньпыр, но тшапа гöгöр дзорвидзысь Олöмлы воча.

Фото- Владимир Ануфриев

"Бобув" висьт. Юкöн. 2012 во.

    Меным оз доймы, кор чизыр тöлыс пöльтö чужöмам. Сiйö неуна васöд да чорыд, берегвывса тöлыс. Жаль тöдтöм. Сiйö меным воча котöртысь вöв стада кодь. Тайö стадаыс вермö вины менö  öти здукöн. Но сiйö сэтшöм мича... Ме сулала вöрзьöдчытöг, пола куньлыны синмöс, пола воштыны мыйкö зэв коланаöс. Мыйла вöвъясыс сэтшöм ёнöсь? Мортыд на дорын – лыа чир, ичöт да вынтöм, кыдз миян дорын – гаг. Ми ог и казявлöй, кор тувччам гаг вылас. И стадаыс вермас не казявлыны, нуас кö менö, ю бокын сулалысь мортöс. Кутшöм жö вынйöра вöвъяслöн юрнуöдысьыс! Статя да тшап, венны позьтöм. Но кодi пуктiс сiйöс мукöдысь вылöджык?

   Муыс дзöрö вöвъяслöн рöдтöмысь. Кыптылö бус, гартчö да надзöникöн бöр водö юбокса лыа вылö. А ме öд верма кувны. Но мыйкö вашкöдö пелям, мый тайö оз ло: "Сöмын эскы.   Эскöмад – мездöм". И ме эска. Сулала да видзöда паныд лэбысь стада вылö. Кутшöм жö гежöда  мортыс тырвыйö гöгöрвоö ассьыс слаблунсö.
      Рытъя гöрдов шондiувса грезд, ёрта-ёрткöд гусьöникöн вензьысь гыяс, ки судзмöн куйлысь  енэж да тöв ныр моз лэбысь стада –  дженьыдик мойд. Некымын здук – и ставыс вошас... Мичлуныс мыйлакö век повзьöдö миянöс. И та вöсна ми помтöг нюжöдчам сылань.
    ... Ю дор изъясыс повзьöны матысмысь вöвъясысь да заводитöны тiрзьыны. Но ныла-зонма – абу изъяс. Найö кöсйöны кувны  öдйö да мичаа. Эскöны помасьлытöм славаö. Öд некор кö оз вунöдны найöс танi, мыйла нö кутасны дженьдöдны ассьыныс шудсö: кедзовтны мичсö? Быд лун – чужан мулы йöзöн сетöм лов. Морт олöм öзйылö би кинь моз да кусö енкöлаас, но уна йöзлöн йитчöм лолыс – помасьлытöм нэма.

  Вöвъясыс котöртiсны водзö... Стадаыс эз казявлы ныла-зонмаöс. Мортыд вылicяньыс тыдавтöм...